Frétt

Ísland tekur í fyrsta sinn þátt í Special Olympics 3X3 FIBA Open sem fram fer í Sviss dagana 20.-21.júní. Liðin á mótinu eru Unified sem þýðir að þrír leikmenn í hverju liði eru Special Olympics leikmenn og tveir sem kallast meðspilarar. Ísland er meðal 15 þátttökuþjóða en Bára Fanney yfirþjálfari Hauka Special Olympics segir að mikil tilhlökkun sé í hópnum að taka þátt í mótinu í fyrsta sinn. Leikmenn Íslands á mótinu koma frá Haukum Special Olympics en aðalleikmennirnir þrír eru Anton Evert Hjartarson, Edvard Þór Ingvarsson og Jónas Bjartur Þorsteinsson en þeir eru allir á aldrinum 16-18 ára. Meðspilarar eru svo Alexander Stefánsson og Bjarki Logason. Þjálfarar liðsins eru Everage Richardson og Stella Hrund Ásbjarnardóttir. 

„Keppnishópurinn hefur verið að æfa aukalega í nokkra mánuði en æfingar hófust um leið og staðfest var að lið frá Íslandi fengi þátttökurétt,“ segir Bára Fanney Hálfdánardóttir yfirþjálfari Hauka Special Olympics.

Hún bætir jafnframt við: „Við kepptum í Svíþjóð í fyrra á Basketligen Special sem var ótrúlega gaman en það mót var spilað 5 gegn 5 en mótið í Sviss er 3 gegn 3.“

Verkefnið er ótrúlega flott hjá hópnum í kringum Special Olympics lið Hauka og gaman að sjá fleiri krakka fá tækifæri til að taka þátt: „Nú eru að opnast fleiri tækifæri fyrir okkur að fara á mót erlendis þar sem fleiri leikmenn okkar eru að ná 16 ára aldri sem er algengt aldursviðmið á þessum mótum. Við erum líklegast yngsta liðið sem tekur þátt í Sviss um helgina. Unified 3x3 reglurnar eru nýjar fyrir okkur og við þurftum að kynna okkur það vel. Leikurinn er ótrúlega skemmtilegur og mjög hraður á sama tíma.“

Að lokum segir Bára Fanney í spjalli við kki.is: „Það er mikill metnaður í hópnum. Allir búnir að æfa vel, eru með mikið keppnisskap og ég veit að þeir munu standa sig frábærlega. Það sem gæti orðið hvað mest krefjandi fyrir liðið er hitinn en leikirnir eru spilaðir utandyra í 30 gráðum. Ég er ótrúlega stolt af leikmönnum og þjálfarateyminu og hlakka til að fylgjast með liðinu um helgina. Ég mæli með að fólk fylgi instagram síðu HaukaSO! Þjálfarar og leikmenn ætla að vera dugleg að setja í story úr ferðinni. Við hlökkum síðan til að sjá meiri 3x3 Unified körfubolta hér á Íslandi. Áfram Haukar og áfram Ísland.“

Við tökum heilshugar undir þetta hjá Báru Fanneyju og hlökkum til að fylgjast vel með liðinu um helgina sem flýgur út í verkefnið í dag. Við hvetjum ykkur öll til að fylgjast vel með en Instagram síða liðsins er:

https://www.instagram.com/haukarso/

Leikir Íslands sem staðfestir eru laugardaginn 20.júní eru eftirfarandi:

Ísland - Sviss kl. 15:30
Ísland - Albanía kl. 16:45
Ísland - Spánn kl. 17:15

Áfram Ísland!

Mynd: Bára Fanney