21 ágú. 2010Úrslit sumardeildarinnar fóru fram í dag en leikið var á nýskýrðu Klambratúni. Það má segja að körfuboltaguðirnir hafa verið í góðu skapi í dag en frábært veður var á meðan úrslitin stóðu yfir. Fjölmargir áhorfendur lögðu leið sína á Klambratúnið og horfðu á úrvals körfubolta og gæddu sér á íspinnum frá Kjörís. Átta lið tóku þátt og var leikið með útsláttarkeppni. Í úrslitum mættust þau lið sem unnu sína riðla Celtics úr A-riðli og Lituanica úr B-riðli. Í bráðskemmtilegum leik þar sem menn tóku fast en drengilega á fór svo að lokum að Lituanica vann 21-16 og fögnuðu liðsmenn og mikill fjöldi stuðningsmanna þeirra innilega. Sumardeildin er nýtt mót á vegum KKÍ en það er götuboltamót sem er búið að vera í gangi í allt sumar sem náði hámarki í dag. Að loknum átta liða úrslitum fór fram þriggja-stiga keppni. Hvert þeirra átta liða sem voru í úrslitum átti einn fulltrúa. Það var liðsmaður Lituanica sem fór með sigur úr býtum en það var Marek Avlas.
