![Finnland og Georgía unnu bæði leiki sína örugglega](http://gamli.kki.is/myndir/FIBA-Europe.jpg)
4 sep. 2006Keppni hófst um helgina í riðli Íslands í b-deild Evrópukeppni landsliða en Ísland spilar eins og kunnugt er sinn fyrsta leik gegn Finnlandi í Laugardalshöllinni klukkan 20.30 á miðvikudagskvöldið. Finnar og Georgíumenn unnu stóra sigri þegar þeir fengu Austurríkismenn og Lúxemborgara í heimsókn en þessar þjóðir, Finnland og Georgía, eru einmitt næstu mótherjar okkar. Finnar unnu Austurríkismenn með 27 stigum í Helsinki, 87-50, þar sem austurríska liðið skoraði aðeins 14 stig í seinni hálfleik. Finnar settu niður 15 þrista í leiknum og héldu Austurríkismönnum í 36% skotnýtingu. Austurríki nýtti sem dæmi aðeins 2 af 12 skotum sínum í lokaleikhlutanum. Hanno Mottola var með 17 stig, Jukka Matinen skoraði 14 stig og Petteri Koponen var með 10 stig. "Þetta var skyldusigur fyrir okkur og þeir eru aldrei auðveldir. Þetta verður mun erfiðara þegar við förum til Íslands því þar mætum við liði sem gefur aldrei neitt eftir," sagði Hanno Mottola, í viðtali á FIBA-Europe síðunni. Georgía byrjar vel en liðið vann 42 stiga sigur á Lúxemborg, 86-44, á heimavelli á sunnudaginn. Fjórir Georgíumenn skoruðu á annan tug stiga, George Tsintsadze var með 15 stig, Tyrone Ellis skoraði 12 stig og þeir Vladimer Boisa og Manuchar Markoishvili voru með 11 stig hvor. Martin Rajniak skoraði nær helminginn af stigum Lúxemborgar meða alls 19 stig.