26 feb. 2001Hingað til lands kom í tilefni af afmælishófi KKÍ Hr. Valdu Suurkask, forseti tækninefndar lþjóðakörfuknattleikssambandsins, FIBA, en hann er sem slíkur einn af valdamestu aðilum innan sambandsins. Tækninefnd hefur yfirumsjón með þróun reglna körfuknattleiks, og annast yfirstjórn dómaramála. Hr. Valdu Suurkask var ánægður með dvöl sína á Íslandi. Hann tók til máls í afmælishófinu og varpaði lofi á íslenskan körfuknattleik. Hann tók sérstaklega til þess hversu mikinn áhuga er að finna meðal þeirra stunda körfuknattleik á Íslandi og hungur þeirra í árangur á alþjóðlegum vettvangi, og vilja til að taka þátt í keppni bestu þjóða álfunnar. Þá gat hann þess í ræðu sinni að það væri merki um samfélagið á Íslandi og stöðu körfuknattleiks að forseti lýðveldisins skuli heiðra sambandið með nærveru sinni í tilefni afmælisins. Hr. Suurkask er frá Eistlandi, þar sem hann á feril sem leikmaður og dómari, en starfar að öðru leyti sem prófessor við tækniháskólann í Tallinn. Hann sýndi sögu og menningu þjóðarinnar mikinn áhuga, og fór hann í skoðunarferð að Þingvöllum á sunnudagsmorgninum áður en hann hélt utan.