7 feb. 2001Upp úr sauð svo um munaði í leik Telindus Antwerpen og Rauðu stjörnunnar frá Belgrad í Evrópukeppni bikarhafa, Saporta cup, í gærkvöld. Hópslagsmál brutust út á milli leikmanna liðanna sem lauk með því að flestir, ef ekki allir, leikmenn liðanna fengu reisupassann. Síðan varð að flauta leikinn af. Nú hefur FIBA kveðið upp úrskurð um hvað skuli gera í framhaldinu svo körfuknattleikurinn verði ekki fyrir skaða og andi íþróttanna sé í hávegum hafður. Ákveðið hefur verið að leikurinn skuli endurtekinn fyrir luktum dyrum. Sá leikur verður 13. febrúar í Deurne í Belgíu. 25 manns frá hvoru félaga að meðtöldum leikmönnum mun verða hleypt inn í íþróttahúsið sem og 5 fréttamönnum á vegum gestanna og 15 fréttamönnum frá Belgíu. Tveir leikmenn liðanna fengu þungar refsingar. Það voru þeir Stefan Sappenberghs frá Antwerpen og Sasa Stefanovic frá Rauðu stjörnunni. Þeir voru dæmdir í þriggja leikja bann og 10 þúsund marka sekt. Auk þess voru þeir átta leikmenn Antwerpen-liðsins, sem reknir voru af leikvelli, dæmdir í 3 þúsund marka sekt hver. Sömu refsingu hlutu níu leikmenn Rauðu stjörnunnar. Félögunum er heimilt að áfrýja þessari ákvörðun til framkvæmdastjórnar FIBA.