5 feb. 2001Zoran Radovic, þróunarfulltrúi frá FIBA, var í heimsókn hjá KKÍ um helgina. Hann kom hingað til að kynna sér starfsemi KKÍ og gera tillögur að því sem betur má fara. Í gærkvöldi var Radovic meðal áhorfenda á leik UMFG og ÍR í undanúrslitum bikarkeppni KKÍ & Doritos. Zoran Radovic er fyrrum landsliðsmaður, en hann lék yfir 100 landsleiki fyrir Júgóslavíu. Hann var um árabil framkvæmdastjóri júgóslavneska körfuboltasambandsins. Hann mun á næstunni heimsækja Evrópuríkin hvert af öðru til að gera úttekt á starfsemi sambandanna og koma með tillögur að því sem betur mætti fara. Radovic kom hingað frá Danmörku, en hann hefur áður heimsótt England, Svíðþjóð og Austurríki. Radovic fundaði með formanni og framkvæmdastjóra KKÍ um helgina þar sem honum var kynnt starfsemi KKÍ og framtíðarsýn. Aðspurður sagðist hann vera mjög ánægður með það sem KKÍ væri að gera. Hann miðlaði af reynslu sinni frá Júgóslavíu og benti á ýmislegt sem reynst hefur vel þar og ef til vill væri hægt að prófa hér á Íslandi. Radovic fór einnig í skoðunarferð um suðurland í gær, fór meðal annars á Gullfoss og Geysi, en hélt af landi brott um miðjan dag í dag.