27 jan. 2001Íslenska landsliðið æfði við nokkuð sérstakar aðstæður í íþróttaskýlinu í Oporto í gær. Vegna mikillar rigningar í gær og slakrar einangrunar skýlisins, voru miklir pollar á gólfi íþróttaskýlisins, nokkuð sem íslenskir körfuknattleiksmenn eiga ekki að venjast. Ekki var þó æft í stígvélum heldur var Sigurður Hjörleifsson aðstoðarþjálfari liðsins öflugur á kústinum og skúraði eins sönnum húsverði sæmir. Sjálfur Sigurjón digri, fyrirmynd allra íslenskra húsvarða, hefði mátt hafa sig allan við, slíkir voru pollarnir. Og fyrir vikið gat liðið æft án vandræða og sundfata. Í dag er minni rigning í Oporto og menn eru farnir að venjast nokkuð svölu veðrinu í suður Evrópu. Allir leikmenn íslenska liðsins eru heilir og klárir í slaginn í dag. Leikur Portugal og Íslands, sem er síðasti leikur liðanna í undanúrslitakeppninni fyrir EM í Tyrklandi, hefst kl. 16:30.