26 sep. 2014![](http://www.kki.is/myndir/icelandair_samningur_kki2014.jpg)
Icelandair endurnýjaði í dag samninga um að vera aðalstyrktaraðili Íþrótta- og Ólympíusambands Íslands og fjögurra sérsambanda innan þess, þ.e. Knattspyrnusambands Íslands, Handknattleikssambands Íslands, Körfuknattleikssambands Íslands og Golfsambands Íslands.
Samningarnir sem undirritaðir voru í dag eru umfangsmiklir og fela í sér víðtækt samstarf Icelandair og þessara íþróttasambanda. Með þessum samningum styður Icelandair dyggilega við starf viðkomandi sérsambanda og landsliðsstarf þeirra sem felur í sér mikil og kostnaðarsöm ferðalög um allan heim. Með samningi Icelandair og ÍSÍ hefur Icelandair staðfest áframhaldandi þátttöku sína sem einn af aðalstyrktaraðilum í Ólympíufjölskyldu ÍSÍ til ársins 2017.
„Við í körfuboltanum erum mjög ánægð með nýja samninginn við Icelandair og hlökkum til með að vinna nánar með þeim í komandi verkefnum sem framundan eru hjá okkur en stuðningur þeirra er okkur mjög mikilvægur í afreksstarfinu, bæði hjá yngri landsliðum sem og hjá A-landsliðunum.” sagði Hannes S. Jónsson, formaður KKÍ, eftir undirritun samningsins.
„Það er mjög ánægjulegt fyrir Icelandair að geta staðfest áframhaldandi samstarf og stuðning með þessum hætti. Íþróttir eru mikill drifkraftur ferðalaga um allan heim og Íslendingar eiga margt afreksfólk á heimsmælikvarða sem veita landsmönnum mikla ánægju og eru öðrum þátttakendum hvatning til dáða“, segir Birkir Hólm Guðnason, framkvæmdastjóri Icelandair.
Samningana í dag undirrituðu forystumenn ÍSÍ, GSÍ, HSÍ, KKÍ, KSÍ og Icelandair.