Hlynur fékk nýja skó frá Útilífi · Verður með á morgun!

26 ágú. 2014Hlynur Bæringsson meiddist sem kunnugt er á ökkla í sigurleiknum mikilvæga í Bretlandi í síðustu viku en nú er útlit fyrir að hann verði með á morgun í lokaleik Íslands gegn Bosníumönnum í Laugardalshöllinni. Ekki nóg með að Hlynur hafi meiðst í lok leiks heldur rifnuðu að auki körfuboltaskórnir hans í átökunum í leiknum og enduðu þeir ferð sína í ruslatunnunni í Copper Box Arena í London að leik loknum. Það voru því góð ráð dýr nú þegar finna þurfti skó í stærð 48 með skömmum fyrirvara. Leitað var til Útilífs og áttu þeir til skó í hans stærð á lager og ákváðu þeir að gefa landsliðsfyrirliðanum skóparið fyrir leikinn mikilvæga á morgun. Það var starfsmaður Útilífs í Kringlunni sem afhenti Hlyni skónna í morgun og Hlynur Bæringsson verður því með á morgun í treyju númer #8 og mun leggja sitt af mörkum til að Ísland tryggi sér sæti á EuroBasket 2015, lokakeppni Evrópumótsins, á næsta ári. Takk kærlega Útilíf og áfram Ísland!