![U16 kk Ísland-Svíþjóð: Naumt var það í þriðja sinn](http://gamli.kki.is/myndir/landslid_20112012.jpg)
18 maí 2012U16 ára karlalandslið Íslands tapaði áðan naumlega gegn heimamönnum í Svíþjóð 59-52. Þetta gerir þriðja ósigurinn í röð hjá U16 ára liðinu á mótinu og allir hafa þeir fallið naumt. Herslumunurinn er það sem vantar og jú enn eina ferðina eru fráköstin okkur dýrkeypt en strákarnir eru að berjast af fullum krafti og fá stórt prik fyrir það. Innkoman: Kári Jónsson kom sprækur inn af bekknum í fyrri hálfleik og lét strax fyrir sér finna. Flautukörfur: Vilhjálmur Kári Jensson setti flautukörfu fyrir Ísland í lok þriðja leikhluta eftir vel útfærða sókn og kom Íslandi í 42-41 fyrir fjórða og síðasta leikhluta. Troðslur: Jú jú, Svíar voru með svoleiðis enda langir til. Tilþrif: Jón Axel Guðmundsson sýndi góð tilþrif í leiknum og skoraði nokkrar fínar körfur en hann var með sex stolna bolta og hans helstu tilþrif voru því í vörninni, sóknarmannahrellir hér á ferð. Sókn: Nýtingin hefði vissulega mátt vera betri, þegar við náðum að keyra í bakið á Svíum gekk best en sóknirnar voru oft stirðar og íslenska liðið fór stundum óvarlega með boltann. Kuldaboli: Svíar komust í 2-9 í upphafi leiks og þá höfðu okkar menn aðeins sett 1 af 8 í teignum og 0 af 4 í þriggja. Seigla: Ísland náði forystunni 27-26 fyrir hálfleik eftir að hafa verið undir allan fyrri hálfleikinn. Þá braust Gunnar Ingi Harðarson að sænsku körfunni og skoraði, vel gert og Ísland vann annan leikhluta 20-13. Svíar áttu hinsvegar lokaseigluna og kláruðu leikinn. Vinnslan: Jón Axel Guðmundsson var iðinn við kolann og í upphafi síðari hálfleiks var kappinn kominn með sex stolna bolta. Óvarlega: Íslenska liðið fór oft óvarlega með boltann í dag, 12 tapaðir boltar en það var þó hátíð miðað við Svía sem misstu hann 27 sinnum. Niðurstaða: Þeir voru brúnaþungir íslensk piltarnir að leik loknum en nú þjappa þeir sér saman og mæta dýrvitlausir í síðasta leikinn á morgun hakka í sig Dani.