![Körfuboltaveisla á Króknum á sunnudaginn](http://gamli.kki.is/myndir/tindastoll.jpg)
30 sep. 2011Nú hyllir undir það að íþróttahúsið á Sauðárkróki verði opnað aftur eftir parketlögn og hefur verið ákveðið að slá upp vígsluleikjum á sunnudaginn. Leikirnir verða jafnframt til fjáröflunar fyrir styrktarsjóð Magnúsar Jóhannessonar og fjölskyldu. Eru það bæði karla- og kvennalið Snæfells sem koma í heimsókn. Kl. 17.15 hefst leikur framtíðarmeistaraflokks Tindastóls og Iceland Express deildarliðs Snæfells í kvennaflokki. Helga Einarsdóttir, sem lék alla sína yngri flokka með Tindastóli og er núna A-landsliðskona og fyrirliði kvennaliðs KR í Iceland Express deildinni, mun spila með heimastúlkum í Tindastóli og verður án efa gaman að sjá Helgu á nýjan leik í Tindastólsbúningnum ásamt framtíðar leikmönnum meistaraflokksins, sem fá þarna verðugt verkefni. Tindastólsliðið verður annars skipað leikmönnum frá 8. flokki og upp í stúlknaflokk. Snæfell verður án þriggja sterkra leikmanna, þeirra Hildar Sigurðardóttur, Öldu L. Jónsdóttur og erlends leikmanns. Kl. 19.15 munu lið Tindastóls og Snæfells í karlaflokki leiða saman hesta sína og verður þar án efa um hörkuleik að ræða. Snæfellsliðið er gríðarlega sterkt og hefur á að skipa mörgum frábærum leikmönnum. Trey Hampton sem Tindastólsliðið hefur samið við fyrir veturinn kom á Krókinn á þriðjudaginn var og mun spreyta sig í fyrsta skiptið með liðinu á sunnudaginn. Keflvíkingurinn Þröstur Leó Jóhannsson mun einnig leika sinn fyrsta leik á heimavelli á sunnudaginn Leikirnir verða fjáröflun fyrir Magnús G Jóhannesson og fjölskyldu en Magnús lamaðist fyrr á árinu í slysi. Rennur ágóði af leiknum í styrktarsjóð fjölskyldunnar. Dómarar leiksins verða ekki af verri endanum, en þeir koma þrír saman og er um sannkallað stórskotalið að ræða; Sigmund Má Herbertsson, Rögnvald Hreiðarsson og Kristinn Óskarsson, en allir eru þeir í hópi bestu og reyndustu dómara landsins og í tilefni dagsins ætlar þeir að gefa alla sína vinnu í styrktarsjóð Magnúsar og fjölskyldu. Nokkrir aðilar hafa lagt körfuknattleiksdeildinni lið við skipulagningu þessa viðburðar, má þar nefna veitingastaðinn Hard Wok og hinn sívinsæla Staðarskála í Hrútafirði auk Bílaleigunnar AVIS. Eru þessum aðilum færðar sérstakar þakkir fyrir þeirra framlag. Nú er um að gera að fagna þessum tímamótum í íþróttalífinu í Skagafirði, sjá endurbætt íþrótthús, horfa á tvo skemmtilega körfuboltaleiki og láta um leið gott af sér leiða. Íþróttahúsið á Sauðárkróki er eftir þessar breytingar eitt albesta körfuboltahús á landinu en körfurnar þykja í heimsklassa og ekki versnar húsið við hið glæsilega parketgólf sem komið er á.