8 sep. 2010
Serbía - Spánn
Spánverjar, núverandi Heims- og Evrópumeistarar mættu Serbum í fyrri leik dagsins. Eftir að Serbar höfðu leitt með átta stigum í hálfleik voru þeir ennþá átta stigum yfir þegar 7 mín. voru eftir.
Þá tók við ótrúlegur kafli hjá Spánverjum sem söxuðu smátt og smátt á forskot Serba og Marc Gasol jafnaði með troðslu þegar 25 sek. voru eftir af leiknum og staðan 89:89
Serbar héldu í sókn og þegar 6 sekúndur lifðu af leiknum tók Milos Teodosic sig til og skaut þriggjastigaskoti tvo metra fyrir utan þriggjastigalínuna og setti hann beint í körfuna og Spánverjar urðu að játa sig sigraða, mögnuð karfa hjá Teodosic, sem er leikmaður Olympiacos á Grikklandi.
Slóvenía - Tyrkland
Slóvenía og Tyrkland mættust í seinni leik dagsins. Tyrkir voru ósigraðir í keppninni og það varð engin breyting þar á. Magnaður sóknarleikur þeirra ásamt góðri vörn skilaði þeim 50 stigum þegar flautað var til hálfleiks og 19 stiga forskoti og Slóvenía náði aldrei að brúa það bil.
Tyrkir sigruðu sannfærandi 95:68. Fimm leikmenn skoruðu yfir 10 stig og ótrúlega góð liðsheild. Esran Ilaysova var með frábæra nýtingu og var stigahæstur með 19 stig.
Það verða því Serbar og Tyrkir sem mætast í undanúrslitunum á laugardaginn kemur