![FIBA heimsþinginu lokið](http://gamli.kki.is/myndir/fiba_thing2.jpg)
7 sep. 2010Í gær lauk heimsþinginu þar sem yfir 170 þjóðir sendu fulltrúa sína á þingið. Ólafur Rafnsson var formlega kosinn í stjórn FIBA World en forsetar allra álfusambandanna eiga þar fast sæti ásamt framkvæmdastjórum hverrar álfu og svo eru einn til tveir aðrir fulltrúar að auki frá hverri álfu. Aðalstjórn FIBA eða "Central Board" skipa því um 20 einstaklinga en að auki er hægt að kalla til þrjá fulltrúa eða sérfræðinga. Eins og kom fram í gær var það Yvan Mainini frá Frakklandi sem tekur við embætti sem forseti FIBA og mun gegna því starfi til ársins 2014 þegar næsta heimsþing fer fram. Margar góðar og gagnlegar umræður voru um störf FIBA og þróun körfuboltans og ljóst að körfubolti hefur fest sig í sessi sem ein vinsælasta íþróttin í heiminum. Meðal annars var rætt um þróun FIBA 33 og möguleikana á útbreiðslu á 3-á-3 forminu, samskipti landanna við sjálfstæðar deildir eins og NBA og Euroeleague var eitt umræðuefni og rætt var um mótahald og keppnisfyrirkomulag, en sökum þess hversu mikið er að vera innan FIBA og aðildarlandanna sjálfra þarf að skipuleggja vel og koma öllum viðburðum fyrir á dagatalinu.