![Unglingalandslið Stúlkna U-18](http://gamli.kki.is/myndir/U18_margret_urtak_08.jpg)
12 jan. 2009Margrét Sturlugsdóttir, landsliðsþjálfari U18 landsliðsins, boðaði 30 manna hóp á æfingar milli jóla og nýárs og svo aftur í byrjun janúar. Alls gáfu 26 stúlkur kost á sér landsliðið en næsta verkefni liðsins er norðurlandamótið í vor í Solna í Svíþjóð. Margrét tók saman smá pistil um hvernig fór: "Það var hressilegur 18. manna hópur stúlkna sem mætti í Stykkishólminn sunnudaginn 28. desember síðastliðin. Það var mikið um veikindi svo það vantaði 8 stúlkur í hópinn en þær sem voru mættar létu það ekki á sig fá og nýttu tækifærið vel til að sýna sig. Daginn eftir var mæting inn í Hafnarfjörðinn á æfingu að Ásvöllum og þá mætti allur hópurinn fyrir utan einn leikmann sem komst ekki. Aftur var tekið vel á því en enn var vottur af feimni og stúlkurnar því teknar í stuttan fyrirlestur um að þetta væri kannski þeirra eina tækifæri til að sýna sig og því ættu þær að nýta tímann og fá þjálfarann með góðu eða illu til að taka eftir sér. Þetta virkaði mjög vel og það mátti heyra öskur og köll í vörninni sem var ánægjuleg tilbreyting frá því að hlusta á stigatöfluna flippa númerum þegar klukkan breyttist. Þriðjudaginn 30. desember var mætt til Keflavíkur og spilað á móti Keflavík-B. Leikurinn var frekar léttur og allar fengu að spila 10 mínútur og sýna sig á móti skipulögðu liði. Þarna kom ýmislegt jákvætt í ljós fyrir mig sem þjálfara og einstaklega gaman að sjá hvað margar eru sjóaðar þrátt fyrir ungan aldur. Laugardaginn 3. janúar 2009 var síðan aftur æft í Keflavík og nú var seinni æfing dagsins notuð í að spila á móti Meistaraflokki kvenna í Keflavík. Þarna hittu stelpurnar fyrir A- landsliðsmanneskjur og fengu smá snefil af því sem bíður okkar úti í Svíþjóð. Ég var mjög ánægð með margt og fékk þarna nasaþef af því hvað þær kunna og sá einnig betur hvernig þær spiluðu saman, ekki fengu allar að fara inn á enda var ég að hugsa um allt annað en að koma öllum að. Lokaæfingin í bili var svo sunnudaginn 4. janúar 2009 í Hveragerði. Þá mættu 25 stúlkur sem voru einbeittar og vissu að þetta var síðasti séns að láta taka verulega eftir sér. Spilaður var leikur og hópnum skipt í tvö lið, hart var barist og gaman að sjá alltaf nýjar og nýjar stelpur sýna flottan leik. Valið verður ekki auðvelt fyrir mig en ég hlakka samt sem áður til að vinna með þeim stelpum sem valdar verða að lokum og að lokum vil ég þakka öllum hópnum fyrir mikinn metnað og góða frammistöðu á öllum æfingum." Kveðja, Margrét Sturlaugsdóttir Landsliðsþjálfari U-18 stúlkna.