![Breiðablik býður frítt á leikinn í kvöld](http://gamli.kki.is/myndir/SmarinnOkt08SB.jpg)
17 okt. 2008Kópavogsbær og körfuknattleiksdeild Breiðabliks bjóða Kópavogsbúum frítt á fyrsta leik Breiðabliks í Iceland Expressdeildinni gegn Skallagrími úr Borgarnesi. Leikurinn fer fram í kvöld, föstudag og hefst kl. 19.15. Tilefnið er 40 ára afmæli körfuknattleiksdeildarinnar og vígsla á nýju glæsilegu gólfi í Smáranum. Fyrir leikinn mun Gunnar Birgisson, bæjarstjóri flytja stutt ávarp og vígja gólfið með formlegum hætti. Í vor var hafist handa við að leggja nýtt og stórglæsilegt parket í Smáranum. Þeirri vinnu lauk síðsumars og er óhætt að fullyrða að íþróttahúsið hafi tekið algerum stakkaskiptum og er nú með þeim glæsilegri á landinu. Breiðablik og Skallagrímur mæta nokkuð breytt til leiks í ljósi aðstæðna í íslensku efnahagslífi. Erlendum leikmönnum hefur fækkað mikið hjá öllum félögum í Iceland Expressdeildinni og verður því afar fróðlegt að sjá hvernig nýliðum Breiðabliks mun reiða af í hópi þeirra bestu.