![Tap fyrir sterku liði Svartfellinga](http://gamli.kki.is/myndir/hlynur_montenegro.jpg)
17 sep. 2008Ísland tapaði fyrr í kvöld fyrir Svartfjallalandi 66-80 í evrópukeppninni. Þrátt fyrir að munurinn hafi ekki verið mikill í leikslok áttu íslensku strákarnir erfitt kvöld og lentu þeir mest 26 stigum undir. Afleit skotnýting varð íslenska liðinu að falli og í fyrri hálfleik nýttu þeir aðeins 21% skota sinna. Fyrstu mínútur leiksins var jafnræði með liðunum en þegar 3 og hálf mínúta var eftir af fyrsta leikhluta skoruðu gestirnir sex stig gegn einu og leiddu með átta eftir fyrsta leikhluta 14-22. Annar leikhluti var íslenska liðinu erfiður og Svartfellingar keyrðu upp muninn jafnt og þétt og höfðu um 15 stig forystu mest allan leikhlutann. Síðustu mínútu hálfleiksins skoruðu Svartfellingar átta stig gegn einu og leiddu með 23 stigum í hálfleik, 24-47. Þegar leið á seinni hálfleik fór íslenska liðinu að ganga betur og skotin sem voru að geiga í fyrri hálfleik fóru að rata ofaní körfuna. Minnkuðu þeir muninn jafnt og þétt en Svartfellingar reyndust of stór biti og höfðu þeir betur 66-80. Stigahæstur í kvöld var Jón Arnór með 20 stig, Logi var með 11 stig og Hlynur Bærings var með 8 stig og 7 fráköst. Næsti leikur liðsins er um helgina gegn Austurríki ytra og verður það síðasti landsleikurinn þetta haustið.