![Tuttugu stiga tap í Svartfjallalandi - byrjuðu og enduðu vel](http://gamli.kki.is/myndir/HelgaEinarsdottirVsSvissAgust08_01_SB.jpg)
10 sep. 2008Íslenska kvennalandsliðið tapaði með 20 stigum, 92-72, í lokaleik sínum í Evrópukeppninni sem fram fór í Bijelo Polje í Svarfjallalandi í kvöld. Íslensku stelpurnar byrjuðu vel og voru 14-17 yfir í fyrsta leikhluta. Þá tóku Svatfellingar öll völd og náðu mest 35 stiga forskoti áður en íslenska liðið náði góðum lokakafla og kom muninum niður í 20 stig. Helena Sverrisdóttir skoraði 34 stig og var aðeins einu stigi frá stigameti Önnu Maríu Sveinsdóttur en bæði Fanney Lind Guðmundsdóttir og Helga Einarsdóttir skoruðu sín fyrstu stig fyrir A-landsliðið. Íslensku stelpurnar komu grimmar til leiks og voru með frumkvæðið í upphafi leiks þrátt fyrir að hafa lent 0-4 undir strax í byrjun. Helena Sverrisdóttir var óstöðvandi í byrjun fyrsta leikhluta og skoraði fimmtán stig á fyrstu 4 mínútunum og 14 sekúndunum en Ísland var þá 15-12 yfir. Þá tók við slæmur kafli þar sem íslenska liðið skoraði ekki fimm síðustu mínútur fyrsta leikhlutans og Svartfjallaland var komið 28-17 eftir hann. Annar og þriðji leikhlutinn voru eign heimastúlkna sem unnu 2. leikhluta 25-12 og voru 53-29 yfir í hálfleik. Munurinn var síðan kominn upp í 29 stig, 70-41, fyrir lokahlutann. Íslensku stelpurnunum gekk illa að ráða við hávaxna leikmenn Svartfjallalands sem bæði tóku mikið af sóknarfráköstum og voru mikið að skora inn í teig. Svarfjallaland náði mest 35 stiga forskoti í lokaleikhlutanum, 83-48, þegar rúmar sjö mínútur voru eftir. Íslenska liðið gafst ekki upp og náði að laga stöðuna með frábærum endaspretti þar sem Ísland vann síðustu sex og hálfu mínútu leiksins með fimmtán stigum, 24-9. Helena Sverrisdóttir fór mikinn á þessum tíma en hún skoraði alls 16 stig í lokaleikhlutanum. Helena Sverrisdóttir endaði leikinn með 34 stig og var því aðeins einu stigi frá því að jafna tólf ára gamalt stigamet Önnu Maríu Sveinsdóttur sem skoraði 35 stig í leik gegn Möltu á Promotion Cup árið 1996. Helena bætti sinn besta árangur um eitt stig en hún skoraði 33 stig gegn Írlandi í Dublin í fyrra. Ragna Margrét Brynjarsdóttir, 18 ára miðherji úr Haukum, var í fyrsta sinn í byrjunarliði A-landsliðsins í kvöld og stóð sig vel en hún var með 11 fráköst og 3 varin skot þótt að hún hafi ekki náð að skora í leiknum. Sigrún Ámundadóttir var einnig grimm í vörn og sókn en hún fékk að glíma við miklu hávaxnari leikmenn í þessum leik. Helga Einarsdóttir og Fanney Lind Guðmundsdóttir skoruðu báðar sín fyrstu stig fyrir A-landsliðið í þessum leik en Helga var að leika sinn fjórða landsleik á sama tíma og Fanney var að spila sinn þriðja A-landsleik. Helga skoraði sína körfu að harðfylgni eftir stoðsendingu Signýjar Hermannsdóttur í upphafi annars leikhluta en Fanney skoraði sína körfu eftir stoðsendingu Helenu Sverrisdóttur tæpri mínútu fyrir leikslok. Fanney gerði gott betur en að setja skotið sitt niður því það var brotið á henni í leiðinni og hún setti síðan vítið sitt niður af öryggi. Svartfjallaland-Ísland 92-72 (28-17, 53-29, 70-41) Atkvæðamestar hjá Íslandi: Helena Sverrisdóttir 34 stig (8 fráköst, 4 stoðsendingar, hitti úr 14 af 24 skotum) Pálína Gunnlaugsdóttir 8 stig (2 þristar) Sigrún Ámundadóttir 7 stig (3 fráköst, 3 stoðsendingar) Signý Hermannsdóttir 6 stig (2 stoðs., 2 varin) Hildur Sigurðardóttir 6 stig Kristrún Sigurjónsdóttir 3 stig Fanney Lind Guðmundsdóttir 3 stig Ingibjörg Jakobsdóttir 2 stig Helga Einarsdóttir 2 stig (3 fráköst) Petrúnella Skúladóttir 1 stig (3 sóknarfráköst)