![Styttist í leikinn - stelpurnar vöknuðu hressar og kátar](http://gamli.kki.is/myndir/landslid_kvenna_team.jpg)
6 sep. 2008Íslenska kvennalandsliðið mætir í dag því írska í fjórða leik liðsins í b-deild Evrópukeppninnar. Leikurinn fer fram í National Basketball Arena og hefst klukkan 14.30 á morgun eða klukkan 13.30 á íslenskum tíma. Það er búist við góðri mætingu og miklum hávaða í höllinni og eru íslensku stelpurnar vel undirbúnar fyrir það. Stelpurnar vöknuðu hressar og úthvíldar og ætla allar að gefa allt sitt í leikinn á eftir. Hótelið fær bestu einkunn og hópurinn náði allur góðum nætursvefni eftir langt og þreytandi ferðalag í gær. Írar hafa unnið tvo síðustu leiki sína en þurfa að hafa mikið fyrir því að halda aftur af íslenska baráttuandanum ef við þekkjum íslensku stelpurnar rétt. Þjálfarinn Ágúst Björgvinsson talaði við leikmennina áðan og lagði línurnar fyrir leikinn á móti Írlandi. Fráköstin koma til með að skipta miklu máli sem sést ekki síst á því að bæði lið eru með 100 prósent sigurhlutfall þegar þau hafa unnið frákastabaráttuna. Það skiptir því öllu að stelpurnar haldi góðri einbeitingu og gleymi ekki að stíga út. Hannes S. Jónsson, formaður KKÍ og fararstjóri ferðarinnar, er nýfarinn á fund með eftirlitsdómara leiksins þar sem farið verður yfir öll gögn og öll leyfi sem skipta máli í tengslum við leik sem þennan. Hannes þurfti meðal annars að fá búning lánaðan til að sýna eftirdómaranum að allt sé í lagi og það var Pálína Gunnlaugsdóttir sem bauð sig fram og lánaði ellefuna sína til skoðunarinnar.