![Frábær annar leikhluti dugði skammt gegn Dönum](http://gamli.kki.is/myndir/NM08_U90kv_10bryndis2_small.jpg)
30 apr. 2008Íslenska 18 ára lið kvenna tapaði með 21 stigi, 46-67, fyrir Dönum í sínum fyrsta leik á Norðurlandamótinu í Svíþjóð. Íslensku stelpurnar voru í góðum málum framan af leik og þremur stigum yfir í hálfleik, 34-31, eftir að hafa unnuð annan leikhlutann með átta stigum. Sóknarleikur íslenska liðsins hrundi hinsvegar í seinni hálfleik og liðið tapaði fyrstu fjórtán mínútum hans 5-28 þar sem liðið var með 16 tapaða bolta á móti tveimur skoruðum körfum. Ingibjörg Jakobsdóttir var stigahæst í íslenska liðinu með 13 stig. Fyrri hálfleikur einkenndist af góðum sprettum beggja liða á víxl. Íslensku stelpurnar byrjuðu leikinn af miklum krafti og komust í 10-5 en Danir voru komnir 15-20 yfir fyrir lok leikhlutann. Danir bættu við forskotið í upphafi annars leikhlutans og voru 18-24 yfir þegar sex mínútur voru eftir af fyrri hálfleik. Þá tók við frábær kafli íslensku stelpnanna sem unnu þessar sex mínútur með níu stigum, 16-7, og voru komnar 34-31 yfir í hálfleik. Ragna Margrét Brynjarsdóttir fór mikinn á þessum kafla í vörn og sókn og skoraði sex af þessum stigum. Ingibjörg Jakobsdóttir var líka allt í öllu í fyrri hálfleiknum og skoraði öll þrettán stig í honum. Eins og fyrri hálfleikurinn var vel spilaður hjá stelpunum þá hrundi leikur liðsins í þeim seinni. Danir skoruðu sjö fyrstu stig hálfleiksins og voru komnir níu stigum yfir, 39-48, þegar þriðja leikhlutanum lauk. Tvö leikhlé Ágústar Björgvinssonar þjálfara dugðu ekki til að snúa við blaðinu og Danir tóku öll völd á vellinum. Íslenska liðið skoraði aðeins fimm stig í hálfleiknum en tapaði á sama tíma 12 boltum. Danir skoruðu síðan 17 fyrstu stig fjórða leikhlutans og íslensku stelpurnar áttu áfram engin svör við ágengri og grimmri boltapressu danska liðsins. Á endanum munaði 21 stig á liðunum eftir að íslenska liðið náði aðeins að laga stöðuna í lokin. Bryndís Hanna Hreinsdóttir lék þarna sinn fyrsta landsleik eins og Dóra Björk Þrándardóttir. Það tók Bryndísi aðeins sextán sekúndur að skora sína fyrstu þriggja stiga körfu fyrir Ísland en körfuna skoraði hún langt fyrir utan línuna í lok þriðja leikhlutans. 18 ára lið kvenna: Ísland-Danmörk 46-67 (15-20, 34-31, 39-48) Stig Íslands: Ingibjörg Jakobsdóttir 13, Ragna Margrét Brynjarsdóttir 10 (20 fráköst, 3 stoðsendingar), Hafrún Hálfdánardóttir 10 (6 fráköst), Íris Sverrisdóttir 7 (5 fráköst, 3 stoðsendingar), Bryndís Hanna Hreinsdóttir 3, Kristín Fjóla Reynisdóttir 2 (7 fráköst), Heiðrún Hödd Jónsdóttir 1.