![Nýir Lýsingarbikarmeistarar krýndir](http://gamli.kki.is/myndir/Hannes_S_Jonsson2007.jpg)
25 feb. 2008Lýsingarbikarkeppninni þetta tímabilið lauk í gær með tveimur glæsilegum leikjum. Tvö ný nöfn voru letruð í bikarsöguna, þar sem kvennalið Grindavíkur og karlalið Snæfells hömpuðu sigri í fyrsta sinn hvort lið. Ég vil því óska Grindavík og Snæfelli innilega til hamingju með þeirra frábæra árangur.
Það er ávallt stór dagur í körfuboltanum þegar leikið er til úrslita í Lýsingarbikarnum og eru mjög margir aðilar sem koma að undirbúningnum svo allt geti gangi snuðrulaust fyrir sig á leikdag. Ég vil hrósa Haukum, Grindavík, Fjölni og Snæfelli fyrir góða undirbúningsvinnu og þakka öllum þeim fjölmörgu sjálboðaliðum sem unnu að undirbúningi dagsins og svo á úrslitaleikjunum sjálfum. Öll þessi lið sem komust í úrslit Lýsingarbikarins unnu vel saman og var gaman að fylgjast með vinnu þeirra við undirbúning leikjanna – allt gert til að gera daginn sem bestan körfuboltanum til heilla.
Lýsingu þakka ég fyrir gott og ánægjulegt samstarf síðustu fimm árin við Lýsingarbikarkeppnina , það er ómetanlegt fyrir KKÍ að eiga svo öflugan bakhjarl sem Lýsing er. Starfsfólk Lýsingar hefur unnið mjög vel með okkur í Lýsingarbikarnum og þau hafa verið óhrædd við að koma með hinar ýmsu hugmyndir til þess að gera Lýsingarbikarinn skemmtilegri fyrir áhorfendur sem og leikmenn. Mig langar sérstaklega að þakka Guðrúnu Soffíu Björnsdóttur markaðsstjóra Lýsingar fyrir gott og gefandi samstarf við Lýsingarbikarinn síðustu ár.
Hannes S.Jónsson
Formaður KKÍ